კახიანის თქმით, ბოლო დღეებში „ნაციონალური მოძრაობის“ წარმომადგენლების განმარტებები აჩვენებს, რომ პარტიას წარსულში განხორციელებული ქმედებების გამო სინანული არ გამოუხატავს. მისი შეფასებით, პარტიის ხელისუფლებაში დაბრუნება ადამიანის უფლებებისა და კონსტიტუციური წყობილებისთვის საფრთხის შემცველი იქნება.
„ჩვენ ეს დღეები ვუსმენთ „ნაციონალური მოძრაობის“ ახსნა-განმარტებებს და ერთი დასკვნის გაკეთება შეიძლება, რომ ეს ძალა არანაირად არ შეცვლილა. ეს არის იგივე ძალა, როგორიც იყვნენ ხელისუფლებაში ყოფნის დროს“, – განაცხადა გიორგი კახიანმა.
მისი თქმით, „ნაციონალური მოძრაობა“ წარსულში განხორციელებულ ქმედებებზე სინანულს არ გამოხატავს და პარტიის მმართველობის პერიოდს დადებითად აფასებს. კახიანის განცხადებით, სწორედ ამ გარემოებებს ეფუძნება საკონსტიტუციო სარჩელი, რომლის მიხედვითაც, აღნიშნული პოლიტიკური ძალა ქვეყნისთვის საფრთხეს წარმოადგენს.
პარლამენტის თავმჯდომარის მოადგილემ ასევე ისაუბრა „კოალიცია ცვლილებისთვის“ შესახებ და განაცხადა, რომ აღნიშნულ პოლიტიკურ გაერთიანებას „ნაციონალური მოძრაობისგან“ განსხვავებულ ძალად არ განიხილავენ.
კახიანის განმარტებით, კოალიციის ლიდერები წარსულში „ნაციონალური მოძრაობის“ ხელისუფლებაში იყვნენ და, მისი შეფასებით, იმავე პოლიტიკას ატარებენ. მისივე თქმით, ორივე პოლიტიკურ ძალას ერთნაირ ბრალდებებს უყენებენ.
„ეს არის კონსტიტუციური წყობილების დამხობა, ძალადობით შეცვლა, ტერიტორიული მთლიანობის დარღვევა და დამოუკიდებლობის ხელყოფა“, – განაცხადა გიორგი კახიანმა.
აღნიშნული განცხადებები გიორგი კახიანმა საკონსტიტუციო სასამართლოს სხდომის დაწყებამდე გააკეთა.