InterPress.ge xəbər verir ki, bu barədə parlamentin İqtisadi Siyasət Komitəsinin sədri Şota Berekaşvili qanun layihəsinin ikinci oxunuşda səsverməsindən əvvəl bildirib.
Onun sözlərinə görə, hakim komanda daxilində, “Xalqın Gücü” və “Avropa Sosialistləri” ilə aparılan məsləhətləşmələrdən sonra iştirakçıların xarici vətəndaşlardan ibarət olma payının 80%-ə qaldırılması barədə razılıq əldə edilib.
Parlament qanun layihəsini bu dəyişikliklə ikinci oxunuşda qəbul edib. Səsvermənin nəticələrinə əsasən, 74 deputat layihənin lehinə, 9 deputat isə əleyhinə səs verib.
Qanunvericilik paketinin bu gün üçüncü oxunuşda da qəbul edilməsi nəzərdə tutulur.
Qanun layihəsinə əsasən, beynəlxalq qumar turniri kazino tərəfindən təşkil edilən, mükafat fondu təşkilatçı tərəfindən əvvəlcədən təminat altına alınan və iştirakçılarının ən azı 80%-ni xarici ölkə vətəndaşlarının təşkil etdiyi turnir hesab olunur.
Layihədə nəzərdə tutulur ki, təşkilatçı klub masasından yalnız beynəlxalq qumar turnirinin keçirilməsi üçün istifadə edərsə və turnirin mükafat fondu 3 milyon laridən çox olarsa, “Oyun biznesi üzrə rüsumlar haqqında” qanuna əsasən həmin klub masası üçün müəyyən edilmiş oyun biznesi rüsumunu ödəməyəcək.
Eyni zamanda, təşkilatçıya beynəlxalq qumar turnirinin keçirilməsindən gəlir əldə etmək hüququ veriləcək. Belə turnirlərin həm kazino fəaliyyəti üçün icazə əsasında təşkil edilmiş obyektlərdə, həm də həmin obyektlərdən kənarda keçirilməsinə icazə veriləcək.