InterPress.ge xəbər verir ki, Qaribaşvili bu prosesdən yayınmaq üçün əlindən gələn hər şeyi etdiyini, lakin nəticədə “amansız reallıqla” üz-üzə qaldığını yazıb.
Keçmiş baş nazir “siyasi maskaradda” iştirak etmək niyyətində olmadığını və buna görə də məhkəmə proseslərinə qatılmayacağını bildirib. O, qərarının prokuror və hakimlərə qarşı şəxsi hörmətsizlik kimi qiymətləndirilməməsini istəyib.
Qaribaşvilinin sözlərinə görə, onun məhkəmə proseslərində iştirak etməməsinin əsas səbəbi bu prosesin siyasi xarakter daşıdığını düşünməsi və siyasi prosesin sistem tərəfindən necə idarə olunduğunu bilməsidir.
“Dünən hakimiyyət ötən həftə dərc etdiyim məktubun həqiqiliyini özü təsdiqlədi. Cəmiyyətə bir daha demək istəyirəm ki, bu prosesdən yayınmaq üçün əlimdən gələn hər şeyi etdim və maksimum səy göstərdim, lakin amansız reallıqla üz-üzə qaldım.
Bu, mənə qarşı amansız siyasi mübarizə, ədalətsizlik və şərdir. Artıq bu utancverici və ölkəmiz üçün təhqiredici siyasi maskaradda iştirak etmək niyyətində deyiləm. Buna görə də məhkəmə prosesində də iştirak etməyəcəyəm. Mənim maraqlarımı yalnız vəkillərim təmsil və müdafiə edəcəklər.
Bununla heç kimi – nə prokurorları, nə də hakimləri təhqir etmək niyyətində deyiləm. Sadəcə, bunun siyasi proses olduğunu və sistemin siyasi prosesi necə idarə etdiyini bildiyim üçün məhkəmə iclaslarına getmək və siyasi maskaradda iştirak etməkdə məna görmürəm. Mən artıq sizin tamaşanızda iştirak etmirəm!
Həmçinin məni maraqlandırmır ki, sizin tərəfinizdən psixoloji və mənəvi təzyiq metodları ilə hansı məhbusa və ya girova mənim haqqımda nə yazdıracaqsınız və mənə hansı ittihamı irəli sürəcəksiniz.
Artıq baş verməli olan baş verib. Buna görə də mənim yeganə yolum və mübarizə vasitəm öz həqiqətimdir. İctimaiyyətlə açıq danışmaq və öz həqiqətimi söyləmək niyyətindəyəm. Qoy xalq mühakimə etsin!” – deyə İrakli Qaribaşvili yazıb.